Դսեղի տուն-թանգարան

Հովհանես Թումանյանը Հայաստանում ունի երկու թանգարան։

Առաջինը տուն-թանգարան է, գտնվում է Դսեղում։ Մեծ բանաստեղծն այստեղ է անցկացրել իր մանկությունն ու պատանեկությունը։

Գալով Դսեղի տուն-թանգարան՝ դու կարող ես տեսնել, թե ինչ պայմաններում են ապրել Թումանյանները, շրջել գեղեցիկ այգում, գնալ տեսնելու քիչ հեռվում գտնվող «Ծովեր» լճակը, որտեղ սիրում էր լինել Թումանյանը, իջնել անտառի խորքում գտնվող Սուրբ Բարձրաքաշի չքնաղ եկեղեցի, ճանապարհին ջուր խմել Գիքորի աղբյուրից․․․

Երևանյան թանգարան

Երևանյան թանգարանը գտնվում է Մոսկովյան 40 հասցեում։ Այդտեղ բանաստեղծը չի ապրել, սակայն թանգարանի երկրորդ հարկի 6 սրահները կառուցված են Հովհ. Թումանյանի թիֆլիսյան վերջին բնակարանի նմանությամբ: Նույն հարկում է Հովհ. Թումանյանի բացառիկ ու բազմաբնույթ գրադարանը՝ ավելի քան 8000 գրքով:

Թանգարան հասնելու համար պետք է բարձրանալ 54 աստիճանով։ Հավանաբար կռահեցիր, որ աստիճանները խորհրդանշում են Մեծ պոետի ապրած 54 տարիները։

Երևանյան թանգարանում այլ հետաքրքիր ցուցանմուշների կողքին հնարավորություն կա տեսնելու Վերնատան սենյակն ու այնտեղ Հովհաննես Թումանյանի հոլոգրաֆիկ պատկերը․ Թումանյանը քայլում է, թերթ է կարդում, հանում է իր գլխարկը և ողջունում այցելուներին։

Երկրորդ հարկում դու կտեսնես, թե գեղագիտական ինչ ճաշակ է ունեցել Թումանյանը։ Անգամ ճաշի սեղանի յուրաքանչուր դետալի մեջ սեր, ուշադրություն ու գեղեցկություն կա։ Պատահական չէ, որ նա ասում էր, թե աշխարհում ամեն ինչի բույրը ճաշակն է։ Թանգարանում իրականացվում են նաև հետաքրքիր կրթական ծրագրեր, որոնց կարող են մասնակցել դպրոցականները։