Ավ․ Իսահակյանի երևանյան տուն-թանգարանը գտնվում է Զարոբյան 20 հասցեում (Բաղրամյան փողոցի հարևանությամբ)։

Իսահակյանի ցանկությամբ Երևանի տունը հիշեցնում է մատուռ՝ եռանկյուն գմբեթով, մուտք-գավիթով։

Այստեղ Վարպետն ապրել է կյանքի վերջին տասը տարիները։ Առաջին հարկում հուշային հատվածն է, որտեղ բանաստեղծի աշխատասենյակն է, ննջարանը, հյուրասենյակը, այգին։

Հյուրասենյակի պատին փակցված գորգը պատկերում է «Սասնա ծռեր» էպոսից այն դրվագը, երբ արաբ ծերունին Դավիթին խնդրում է չկոտորել զորքին։

Գորգը գործվել է էպոսի 1000-ամյակի առթիվ 1939 թ․։

Երկրորդ հարկում թանգարանի գրական հատվածն է։ Այստեղ տեղի են ունենում հանդիպումներ, միջոցառումներ։ Հետաքրքիր է Ռիալտոյի կամրջի վրա ներկայացվող Իսահակյանի «Մի մրահոն աղջիկ տեսա» բանաստեղծության 3D անիմացիան։

Թանգարանում կազմակերպվում են դպրոցական տարբեր տարիքների համար նախատեսված կրթական ծրագրեր՝ «Էպոսի հետքերով», «Ես և մայրաքաղաք Անին» և այլն։